Бројаници
Б Р О Ј А Н И Ц И
Бројаниците се молитвено оружје на монасите, монахињите и на сите христијани. При замонашувањето секој монах и монахиња добиваат бројаници од својот духовник. Тогаш духовникот вели:
Молитвена употреба:
Молитвата „со бројаници„ е еден од најстарите начини на молитва, особено негуван од страна на монасите. Највообичаена молитва со која се молиме со бројаниците е Исусовата молитва, која гласи: „Господи Исусе Христе, Сине Божји, помилуј ме грешниот (грешната)„; или во пократка форма: „Господи Исусе Христе, помилуј нé“. Бројаницата се користи за броење на изговорената Исусова молитва, при што секој јазол од бројаницата означува едно кажување на молитвата.
Исусовата молитва е многу важна молитва за секој православен христијанин. Таа е најкратката молитва и ги заменува другите молитви. Ако често и непрестајно се повторува, таа внесува во срцето неискажлив мир и благодат.
Молитвата може да биде упатена и кон Пресвета Богородица: „Пресвета Богородице, спаси нé“; или кон одреден светител или светителка, на пример: „Свети Никола, моли го Бога за нас“. Притоа, се молиме за наше лично спасение, за спасение на своите ближни, на својот народ и за спасение на целиот свет.
Начин на плетење:
Постои едно старо предание, според кое некаде околу четвртиот век по Христа, еден монах сакал да направи волнени бројаници за да ги брои своите молитви, но ѓаволот постојано му ги расплетувал јазлите што тој ќе ги сплетел. Откако усрдно се молел, бидејќи демоните го попречувале и не можел да го извршува своето молитвено правило, му се јавил ангел Господов и му ја открил вештината на плетењето бројаници. Тој го научил монахот да плете јазол што се состои од седум вплетени крста, односно секој јазол се состои од седум крстовидни внатрешни мали јазли. Тоа е еден од најсложените јазли што воопшто постои. Ваквите бројаници ни ѓаволот не може да ги расплете.
Бројаниците имаат симболичен карактер. Нивната боја е црна, што упатува на потребата од постојано покајание. Сепак, во денешно време, бројаниците можат да бидат во најразлични бои. Се плетат од свиленкаст конец или од чиста овча волна, како сеќавање дека сме словесни овци на Добриот Пастир Господ Исус Христос, Кој, како Јагне Господово, пострадал за нас и нé избавил од вечната смрт. Малите бројаници имаат 33 (триесет и три) јазли. Има и поголеми бројаници со 50, 100 или 300 и повеќе јазли.
Добро е молитвата да се кажува редовно, во одредено време на денот, наутро и навечер. Тоа помага умот полесно и побрзо да се концентрира на зборовите од молитвата. Можеме да се молиме секогаш и насекаде, а тоа да не го знае никој друг освен нашиот Господ на Кого и Му се молиме. Молитвата треба да се извршува во покајание и смирение, „во тајната одаја на срцето“ …
Оттаму, драги верници, бројаницата има молитвено значење и не треба да биде само „украс„ на раката, туку молитвен меч за прогонување на нечистите сили.